As júnior lucenses compiten de poder a poder e manteñen a terceira praza
O Arenal Emevé caeu por 1-3 diante do Ciudad de A Coruña, líder invicto da Primeira División júnior feminina, nun encontro intenso e moi disputado (28-26, 16-25, 25-27 e 19-25). As lucenses ofreceron unha actuación de mérito ante o conxunto máis regular da categoría, nun partido decidido por pequenos detalles.
O primeiro set foi unha mostra da igualdade que marcaría o choque. O Arenal Emevé amosou carácter e sangue frío para pechar un parcial longo e esixente por 28-26, levantando á bancada e confirmando que podía competir de ti a ti. A reacción visitante chegou no segundo set, pero no terceiro as lucenses volveron entrar de cheo na loita, nun parcial moi equilibrado que se resolveu nos puntos finais. No cuarto, o líder impuxo maior continuidade, aínda que o Emevé non deixou de loitar ata o derradeiro balón.
A pesar da derrota, o Arenal Emevé mantense na terceira posición da clasificación, consolidando a súa presenza na zona alta e confirmando o bo momento dun equipo que está a ofrecer un rendemento sólido ao longo da tempada.
Na próxima xornada, as lucenses visitarán ao Ames, nun novo compromiso no que buscarán recuperar a senda do triunfo e seguir defendendo a súa posición privilexiada na táboa.
