As lucenses compiten con intensidade pese ao resultado adverso
O Emevé San Lorenzo non puido sumar nesta xornada da Terceira División feminina e cedeu por 0-3 fronte a Aldebarán nun encontro no que as lucenses amosaron actitude competitiva e loita constante, malia atoparse cun rival máis efectivo nos momentos clave.
O primeiro set estivo máis igualado do que reflicte o marcador final. O Emevé San Lorenzo mantívose no partido durante boa parte do parcial, competindo con orde e intensidade, pero Aldebarán soubo aproveitar mellor os puntos decisivos para pechar o set por 20-25.
No segundo parcial, as lucenses volveron ofrecer unha boa versión, mantendo o pulso ao rival e sen perderlle a cara ao set. A igualdade foi a tónica durante moitos tramos, aínda que novamente pequenos detalles decantaron o parcial do lado visitante por 21-25.
Xa no terceiro set, Aldebarán impuxo o seu ritmo con maior claridade, mentres que o Emevé San Lorenzo non conseguiu atopar a regularidade necesaria para frear o empuxe rival, pechándose o encontro cun 14-25.
A pesar da derrota, o Emevé San Lorenzo mantense no 3º posto da clasificación cun balance de cinco vitorias e tres derrotas, unha posición que reflicte o bo traballo realizado polo equipo ao longo da tempada.
Na próxima xornada, as lucenses abrirán o ano visitando ao Liceo La Paz B na Coruña, nun compromiso esixente ante o segundo clasificado, un rival que suma seis vitorias e tan só unha derrota, nun duelo que servirá para medir novamente a capacidade competitiva do Emevé San Lorenzo.
