Os lucenses ofreceron intensidade, orgullo e unha notable evolución pese á derrota ante o Xiria
O Infantil Masculino do Millavén CP Lucense caeu por 27-33 fronte ao Xiria nun encontro trepidante, marcado pola loita pola praza no Top8 e pola gran entrega dos locais ao longo dos sesenta minutos.
O partido arrincou cun Xiria máis acertado, capaz de abrir as primeiras diferenzas no marcador. Con todo, o Millavén reaccionou con carácter e conseguiu reducir a distancia ata situarse a un só gol, apoiado no traballo ofensivo de Ernesto —máximo goleador con 8 tantos— e de Víctor, que sumou 6. O esforzo do conxunto lucense mantivo o choque moi vivo, aínda que un novo impulso dos visitantes antes do descanso deixou o marcador en 14-17.
Tras a reanudación, o Millavén volveu demostrar ambición. Mediado o segundo período, os lucenses achegáronse de novo a tan só un gol de diferenza, tirando de intensidade e dunha anotación repartida entre Óscar (4), Hugo L. (3), Breixo (3) e Aryan (3). Rayan sostivo ao equipo desde a portería, permitindo que a formación local seguise con opcións reais de remontada.
Porén, nos instantes finais apareceron certas precipitacións en ataque, xunto cun maior acerto visitante, factores que ampliaron a brecha ata o 27-33 final.
A pesar do resultado e do terceiro posto nesta primeira fase, o Millavén exhibiu unha moi boa imaxe, reflectindo unha clara evolución no seu xogo e unha capacidade de loita que reforza a confianza do equipo de cara ao que vén.
