O Infantil Feminino lucense impón o seu traballo defensivo e a súa eficacia ofensiva para superar ao Xiria nun encontro moi completo.
O Infantil Feminino do Millavén CP Lucense comezou a segunda fase cunha vitoria convincente diante do Xiria, nun partido no que as lucenses amosaron desde o inicio unha clara intención de levar o control do xogo. A concentración e o rigor defensivo foron as bases dun encontro que Millavén soubo madurar con solvencia.
Xa nos primeiros minutos, o conxunto lucense marcou diferenzas apoiándose nunha defensa moi firme, o que lle permitiu abrir fenda no marcador e chegar ao descanso cunha vantaxe de seis goles (16-10). A primeira metade deixou boas sensacións tanto polo traballo colectivo como pola capacidade para transformar as ocasións creadas.
Na segunda parte, o escenario mantívose practicamente intacto. Millavén seguiu superando a defensa mixta proposta polo Xiria e conservou a renda grazas á continuidade no seu labor defensivo. A pesar de que o marcador puido ser máis amplo cun maior acerto no lanzamento, as lucenses controlaron o ritmo do partido ata pechalo no definitivo 27-21, certificando unha vitoria moi merecida.
No apartado individual destacou con claridade Lola, autora de 14 goles, ben acompañada por Aicha e Natalia, con 4 tantos cada unha, nun equipo que repartiu responsabilidades ofensivas e mantivo unha liña de xogo constante durante todo o encontro.
Alineación do Millavén CP Lucense:
Aldara; Aicha (4), Lola (14), Lina (2), Carlota (1), Natalia (4), Uxía, Iria (1), Jimena (1) e Valentina.
Árbitros: Nicolás Núñez e Jose López.
