Os xuvenís lucenses manteñen a terceira praza tras dous encontros esixentes consecutivos
Non foi unha saída sinxela para o Arenal Emevé, que caeu por 3-0 na cancha do Vigo (26-24, 25-18 e 25-20) nun partido no que os lucenses ofreceron resistencia, especialmente nun primeiro set decidido por detalles mínimos.
O encontro comezou cun parcial moi igualado, no que o Emevé sostivo o pulso ante o líder e estivo preto de golpear primeiro. A partir de aí, Vigo impuxo maior regularidade, pero o conxunto lucense mantivo a intensidade e a competitividade, loitando cada punto e sen descompoñerse en ningún momento.
Con esta derrota —a segunda consecutiva— o Arenal Emevé xuvenil masculino sitúase na terceira posición da clasificación, empatado con Korbis no segundo posto, tras caer na pista do primeiro clasificado. A igualdade na zona alta da táboa mantén aberta a loita polas primeiras prazas.
Na próxima xornada, os lucenses recibirán ao Narón, último clasificado, nun encontro no que buscarán reencontrarse coa vitoria e recuperar impulso na competición.
