O Arenal Emevé asegura praza no Campionato Galego e consolida o terceiro posto
Misión cumprida para o Arenal Emevé, que se impuxo con claridade ao Ames por 0-3 (16-25, 21-25 e 21-25) na Primeira División júnior feminina. Unha vitoria que permite ás lucenses regresar á senda do triunfo e, ao tempo, asegurar matematicamente unha praza no Campionato Galego, asentándose no terceiro chanzo da clasificación.
O encontro comezou cun primeiro set dominado polo Emevé, que marcou diferenzas desde o inicio cun xogo ordenado e eficaz. No segundo e terceiro parcial, Ames opuxo maior resistencia, pero as lucenses souberon manter a calma nos momentos decisivos, pechando ambos sets con madurez competitiva e sen deixar opción á reacción local.
O resultado confirma a regularidade dun equipo que foi medrando ao longo da tempada e que chega ao tramo final co obxectivo cumprido e coa ambición intacta.
Na próxima xornada, o Arenal Emevé regresará á Casa do Deporte para recibir ao Maniotas, penúltimo clasificado, nun encontro no que buscará seguir sumando e manter o bo momento de forma.
