O Arenal Emevé recupera a senda do triunfo ante Oleiros
O Arenal Emevé pechou o 2025 cunha vitoria moi traballada na Primeira División cadete feminina tras impoñerse por 3-1 a Oleiros. As lucenses amosaron carácter, capacidade de reacción e un bo nivel competitivo para sumar a segunda vitoria da tempada e marchar ao parón coas mellores sensacións.
O encontro comezou cun primeiro set claramente dominado polo Arenal Emevé. Cun xogo sólido e intenso, as lucenses marcaron diferenzas desde o inicio e pecharon o parcial cun claro 25-14.
No segundo set chegou a reacción de Oleiros. O parcial foi moi igualado e decidiu nos puntos finais, cunha mínima vantaxe para as visitantes, que se levaron o set por 24-26. Lonxe de afectarlles, este contratempo serviu para activar aínda máis ao conxunto lucense.
O terceiro set foi unha mostra de madurez do Arenal Emevé. As lucenses recuperaron o control do xogo, mantiveron a concentración e pecharon o parcial por 25-20, volvendo poñerse por diante no marcador.
No cuarto e definitivo set, a igualdade foi máxima. Ambos equipos loitaron cada punto, pero o Arenal Emevé estivo máis acertado nos momentos decisivos e pechou o encontro cun axustado 25-23, certificando unha vitoria de mérito.
Con este resultado, o Arenal Emevé suma a súa segunda vitoria da tempada e despide o 2025 volvendo á senda do triunfo, un impulso importante para afrontar a segunda parte da competición.
Tras o parón do Nadal, as lucenses terán un test de altura ao visitar ao Liceo La Paz na Coruña, terceiro clasificado, no primeiro compromiso oficial de 2026.
