O conxunto lucense impúxose por 1–4 ao Nautalia Viajes nun partido cheo de intensidade e bo xogo, que confirma o gran momento competitivo da canteira do Dez Portas.
Resultado:
Nautalia Viajes 1–4 CD Dezportas Goce Viajes
Resumo do partido:
O CD Dezportas Goce Viajes continúa a dar pasos firmes na 1ª División Galega e asinou en Narón unha vitoria de mérito (1–4) que reforza a boa dinámica do equipo e o potencial dos seus mozos, todos formados na canteira.
O encontro abriu cun dobre de máxima igualdade, onde a parella composta por Iván Rois e Daniel López tirou de oficio e concentración para levarse o punto inicial por 2–3 (11-13, 11-6, 12-14, 16-14, 10-12). Un triunfo que deu confianza ao equipo e marcou o ton competitivo da tarde.
Nos individuais, Mateo Sánchez debutou con valentía ante un rival experimentado e, malia caer por 3–0, deixou moi boas sensacións. Pola súa banda, Román Iglesias volveu ser determinante, asinando dúas vitorias solventes (0–3 e 1–3) fronte a José Castro e Javier Blanco, nas que exhibiu serenidade, control e unha excelente lectura táctica.
Tamén Óliver López completou unha actuación de nivel, impoñéndose por 2–3 nun choque moi igualado ante Modesto Carrasco. A súa capacidade para manter a calma nos momentos decisivos resultou clave para asegurar o cuarto punto e sentenciar o encontro.
Con esta vitoria, o CD Dezportas Goce Viajes continúa a medrar e a consolidarse como un dos equipos revelación da categoría. A combinación de talento, traballo e compromiso está a converter o proxecto da base nun referente do tenis de mesa lucense.
Próximo encontro:
23/11/2025 – 11:00 h
Pavillón de Tenis de Mesa de Frigsa (Lugo)
CD Dezportas Goce Viajes vs Central Asesora Firacris Narón
